In Kruispad vertel Paul Young, skrywer van die internasionale topverkoper, The Shack (in Afrikaans uitgegee as Die Shack), 'n hartroerende storie van transformasie in 'n man se lewe wat vasgevang was in sy eie bestaan, iewers tussen hemel en aarde. Anthony Spencer is 'n selfsugtige en egosentriese sakeman wat niks in die pad van sy sukses laat kom nie. Dit is tot die dag wat hy met serebrale bloeding in die waakeenheid beland. Hy 'ontwaak' in 'n surrealistiese wêreld waar hy duidelike interaksies met ander het, en hoewel hy aanneem dat hulle projeksies van sy eie verbeelding is, volg hy nietemin hul riglyne met die hoop dat dit na egtheid en selfs verlossing sal lei. Sal hierdie onverwagse samekoms van gebeure Tony dwing om te besin oor sy lewe en sal hy die moed hê om 'n besluit te neem oor 'n kwessie wat 'n ander onreg aangedoen het voor hy in die koma verval het? Paul Young is 'n uiters bekwame skrywer wat nie bang is om onderwerpe van diep teologiese belang aan te pak nie en Kruispad belowe om 'n blywende geestelike en emosionele indruk op lesers te laat en hul lewens te verander.