Ons Afrikaner-nasie is op verskeie maniere getemper. Deel van die boek handel oor die ontberings en terugslae wat die Boeremense verduur het. Veral die pioniers wat hulle agter die Magaliesberg kom vestig het was taai gewees. Hulle was baie gesteld op hulle godsdiens en hulle vryheid.
Die Groot Trek en veldslae soos Vegkop en Bloedrivier het hulle versterk in hulle geloof en die strewe na vryheid. Maar die Geldmag het hulle nie uitgelos nie. Hulle het selfs die Britse oorlogsmasjien teen die paar duisend Boere ingespan om hulle te onderdruk en die grondstowwe van die Boererepublieke in te palm.
Gelukkig het die Boeremense altyd weer kop opgetel en met harde werk en vernuftige beplanning op die been gekom. Deel 3 handel oor baie van die terugslae, beide mensgemaak en natuurlik van aard. Dit beskryf ook die menslike ontbering en die verlies aan waardevolle lewens.